మనసు

ఒక పరి కోరునేకాంతము, మరొక పరి వాంఛించు సంగత్వము
మనసు మనసునెరుగుట మనిషి పాటి కాదు!

ఒక నాడు పలకరింపుల కెదురుచూడు, మరునాడు తలుపు మూసి తనలోనే తానాడు
వింత మానముల మనసు విత్తమెవరు ఎరుగు?

పర్వతముపై నిల్చి పరువాలు వొలికించు, పాతాళమున దాగి పాహియని ప్రార్ధించు
ధీరత్వము చూపి దిక్కులదిరించు, భీరువై భీతిల్లి భయముగొల్పు
చిత్రమే ఈ చిత్త చిత్రలేఖనము!

రేయిపవలు కన్న క్షణము క్షణముకన్నా
ఊపిరాట సలిపే శ్వాస చలనము కన్నా
వేగమీ హృదయ పరివర్తనా ప్రావీణ్యము
వ్యర్ధమే దానినరయ చేయు మథనము

ఊరికే ఓ కంటగని సాగిపో నవ్వుతూ, ఊరడించ చూడకు ఊహకందరాదు
మదిని మదికి వదిలి ముందుకేగు మనిషీ! వెంటపడి వచ్చునదే నీ బాటను, మనసు పరిచి!